ക്രിസ്തുവിന്റെ മരണശേഷമുള്ള 21 നൂറ്റാണ്ടുകളില് ക്രിസ്തുമതം വളര്ന്നതിന്റെ ചരിത്രം പ്രമേയമാകുന്ന ഇംഗ്ലീഷ് എഐ സിനിമ റൈസിംഗ് എംബേഴ്സ് ജൂണ് അവസാനവാരത്തില് തിയറ്ററുകളില് എത്തും.
പൂര്ണമായും ആര്ട്ടിഫിഷല് ഇന്റലിജന്സ് സാങ്കേതികവിദ്യയുടെ സഹായത്തോടെ നിര്മിച്ചിരിക്കുന്ന ചിത്രം, ഒരു ഫിലിം കോളജ് കാമ്പസിനകത്ത് പൂര്ണമായും തയാറാകുന്ന സിനിമയാണ്.
ഒരു എഐ ഡോക്യുമെന്ററിയായി കണ്ട സ്വപ്നമാണ് 120 മിനിറ്റ് ദൈര്ഘ്യമുള്ള സിനിമയായി മാറിയത്. മറ്റക്കര ക്രിയേറ്റീവ് ഹട്ട് അക്കാദമിയിലെ അധ്യാപകരുടെയും വിദ്യാര്ഥികളുടെയും നേതൃത്വത്തിലാണ് ചിത്രം ഒരുക്കിയിരിക്കുന്നത്.
കോളജ് ഡയറക്ടര് എബിന് അലക്സ്, അനു ജോസഫ്, ലിസി കെ. ഫെര്ണാണ്ടസ് എന്നിവരുടെ സംവിധാന മേല്നോട്ടത്തില് ഇന്ത്യയിലെ ഒമ്പത് സംസ്ഥാനങ്ങളില്നിന്നുള്ള 20 വിദ്യാര്ഥികള് സിനിമയുടെ വിവിധ മേഖലകളില് പ്രവര്ത്തിച്ചുണ്ട്.
ചിത്രത്തിന്റെ കഥ രചിച്ചിരിക്കുന്നത് പി.ജെ. കുര്യാച്ചന്, ജോണി ഫിലിപ്പ് എന്നിവരാണ്. കഥാപാത്രങ്ങളുടെ രൂപകല്പ്പന, ദൃശ്യാവിഷ്കാരം, പശ്ചാത്തല സംഗീതം തുടങ്ങി സിനിമയുടെ എല്ലാ ഘടകങ്ങളും നിര്മിത ബുദ്ധിയുടെ സഹായത്തോടെയാണ് സൃഷ്ടിച്ചിരിക്കുന്നത്.
20 വര്ഷമായി പ്രവര്ത്തിക്കുന്ന ക്രിയേറ്റീവ് ഹട്ട് അക്കാദമിയില് ഇന്ത്യയിലെ എല്ലാ സംസ്ഥാനങ്ങളില്നിന്നും ഫോട്ടോഗ്രഫി, സിനിമാറ്റോഗ്രഫി, ഫിലിംമേക്കിംഗ് എന്നിവ പഠിക്കാന് കുട്ടികള് എത്തുന്നുണ്ട്.
സിനിമയുടെ ദൃശ്യങ്ങള്, പാട്ട്, കഥാപാത്രങ്ങള് എല്ലാം എഐയാണ്. റൈസിംഗ് എംബേഴ്സ് സാങ്കേതിക നവീകരണവും ആത്മീയ പ്രമേയവും സമന്വയിപ്പിക്കുന്ന വ്യത്യസ്ത സിനിമാനുഭവമായിരിക്കുമെന്ന് അണിയറ പ്രവര്ത്തകര് അറിയിച്ചു.